ညီငယ် အမောပြေစေဖို့ ( ၁ )

အတ္တာဟိ အတ္တနော နာထော
" ဗိုလ်လောင်းတို့ အတ္တာဟိ အတ္တနော နာထော - ဆိုတာဘာလဲ "
" မိမိကိုယ်သာ ကိုးကွယ်ရာပါ "
" အေးဟုတ်တယ်၊ ကိုယ့်ကိုကိုယ် အားကိုးမှ၊ ကြိုးစားမှ အရာရာ အောင်မြင်မယ်။ ကိုယ့် Intake နဲ့အတူ တစ်နှစ်တစ်တန်း မှန်မှန်အောင်ဖို့ အတွက် လေ့ကျင့်ရေးပိုင်းရော၊ စာပေပိုင်းပါ ကိုယ်စီကြိုးစားဖို့လိုတယ်.. ..

××××××××××××××××××××××

" သား ဆယ်တန်းဆိုတာ ဘ၀မှာ အရေးကြီးဆုံး စာမေးပွဲပဲ.. ။ နှစ်ချင်းပေါက်အောင်ဖို့လိုတယ်။ ဖေဖေတို့က ဘယ်လောက်ကောင်းတဲ့ ကျူ ရှင်တွေ၊ ဘော်ဒါတွေထားထား အဓိကက သားရဲ့ကြိုးစားမှုပဲ။ ဗုဒ္ဓက အတ္တာဟိ အတ္တနော နာထော မိမိကိုယ်သာ ကိုးကွယ်ရာလို့ ဟောကြား ခဲ့တယ်ကွ။ "
" ဟုတ်ကဲ့ပါ ဖေဖေ၊ သားကြိုးစားပါတယ် "

××××××××××××××××××××××

" ဒီနေ့ ဘာနေ့လဲ ရှင်သိလား "
" တနလာင်္နေ့လေ "
" အဲဒါရှင်ပြောမှလား ၊ သားစာမေးပွဲ စဖြေရမယ့်နေ့လေ "
" အေးအေး "
" ဘာအေးအေးလဲ ၊ ၉ နာရီမတ်တင်းမှာ တပ်ရင်းရုံးကနေ အိမ်ခဏပြန်လာခဲ့ "
" ဟာ ဘာလုပ်မှာလဲဟ၊ သား သူ့ဟာသူ စာမေးပွဲဖြေမှာ အတ္တာဟိ အတ္တနော နာထောပါ မိန်းမရာ "
" ရှင့်ဟာရှင် အတ္တာဟိ ဟိ မဟိဟိ၊ ရှင်ကိုယ်တိုင် ၉ နာရီမှာ ဘုရားကို ဖယောင်းတိုင် ၉ တိုင် မီးထွန်းပူဇော်ရမယ် "


နတ် ( ၁ ) ၊ ဗုံး ( ၁ )
ပထမနှစ် ဗိုလ်လောင်းများ စစ်ဗျူဟာ သင်ခန်းစာ ပို့ချချိန် ကိုယ်စီတာဝန်များအကြောင်း နည်းပြက ဆွေးနွေးနေစဉ် အိပ်ငိုက်နေသော ဗိုလ်လောင်းမှာ စာမေးခံရလေသည်။
နည်းပြ ။ ။ အိပ်ငိုက်နေတဲ့ ဟိုဗိုလ်လောင်း ထပါဦး၊ နတ် ( ၁ ) ၊ ဗုံး ( ၁ ) ဆိုတာဘာလဲ။
ဗိုလ်လောင်း။ ။ စားရိပ်သာက မီးဖိုကြီးမှာ ထမင်းဗန်း ( ၁ ) နပ်စာ မနပ်လေ ၀က်စာပုံး ( ၁ )ပုံး ပိုထွက်လာလေပါပဲ။
နည်းပြ။ ။ ဗိုလ်လောင်း မင်း CAD သုံးရက်ပြေး သင်ခန်းစာချိန်အိပ်ငိုက်လို့။
ဗိုလ်လောင်း။ ။ ဟုတ်။

ဖြေလိုက်ပုံ
မြန်မာစာဆရာက ဒုတိယနှစ်ဗိုလ်လောင်းများကို အင်းဝခေတ်စာဆို ရှင်မဟာရဋ္ဌသာရ ရေးဖွဲ့သော နှမလက်လျှော့နေလေတော့ ကဗျာ ကိုသင်ကြားနေစဉ် အိပ်ငိုက်နေသော ဗိုလ်လောင်းတစ်ဦးကို မြင်လိုက်ရာ -
ဆရာ ။ ။ နောက်တန်းက ငိုက်နေတဲ့ ဗိုလ်လောင်းထစမ်း ။ နှမလက်လျှော့နေလေတော့ ကဗျာကို ဘယ်သူရေးဖွဲ့တာလဲ။
ဗိုလ်လောင်း။ ။ ရေးဖွဲ့တဲ့သူကို မသိပါဘူး ။ ဆိုတဲ့သူကတော့ တွံတေးသိန်းတန်ပါ ။

ရောဂါ ပျောက်ချိန်
နယ်ကျော်ပြေးပြိုင်ပွဲအတွက် လေ့ကျင့်စဉ် ခြေထောက်နာသွားသည့် ပထမနှစ်ဗိုလ်လောင်းကို သူ့ Guardian နောက်ဆုံးနှစ် ဗိုလ်လောင်း ကနှစ်သိမ့်စောင့်ရှောက် လာသည်မှာ တစ်ပတ်ခန့် ရှိလာပြီဖြစ်သည်။
နောက်ဆုံးနှစ်ဗိုလ်လောင်း ။ ။ညီလေး မင်းခြေထောက်နာတာက ဘယ်အချိန်မှ ပျောက်မှာလဲကွ။ ဒဏ်ရာလဲမတွေ့ဘူး။ ငါတောင်မင်း ကြည့်ပြီး စိတ်ဓာတ်ကျလာပြီ။
ပထမနှစ်ဗိုလ်လောင်း ။ ။ ဘာမှစိတ်ဓာတ် မကျပါနဲ့ အစ်ကို။ Out pass ထွက်ရင် ကောင်းသွားမှာပါ။

မီးမှုတ်ချိန်
မီးပိတ်ချိန်တွင် ဖယောင်းတိုင်ထွန်းပြီး ဖိနပ်တိုက်နေသော ပထမနှစ်ဗိုလ်လောင်းတစ်ဦးကို တပ်ခွဲတာဝန်မှူး ဗိုလ်လောင်းတွေ့ရာ -
တာဝန်မှူး ။ ။ First Year မီးပိတ်ချိန်မှာ ဘာဖြစ်လို့ ဖယောင်းတိုင် ထွန်းထားတာလဲ။
ဗိုလ်လောင်း။ ။ ဟုတ်.. သတင်းပို့ခွင့်ပြုပါ ။ မီးပိတ်ချိန်လို့ပဲအော်ပြီး မီးမှုတ်ချိန် မအော်သေးလို့ပါ။

ပြုံးထားပါ..
အပြစ်ပေးခံနေရသည့် Final Year Squard ထဲက ပြုံးစိစိလုပ်နေသော ဗိုလ်လောင်းတစ်ယောက်ကို အရာရှိတွေ့သွားသည် ။
အရာရှိ ။ ။ ပြုံးနေတဲ့ Final Year ထပါဦး ။ အပြစ်ပေးတာပျော့လို့လား။
ဗိုလ်လောင်း။ ။ မဟုတ်ပါဘူး ဗိုလ်ကြီး။
အရာရှိ။ ။ ဒါဆိုဘာလို့ ပြုံးနေတာလဲ။
ဗိုလ်လောင်း။ ။ ကျွန်တော့်ကောင်မလေးက ဘယ်လိုဒုက္ခနဲ့ပဲတွေ့တွေ့ အမြဲပြုံးနိုင်အောင် ကြိုးစားရမယ် မှာထားလို့ပါ။

အဝေးတစ်နေရာမှာ ပညာဆည်းပူးနေသော ညီငယ်လေး ပြုံးပျော်နိုင်စေရန် ရည်ရွယ်ပါသည်။ ညီငယ်အား လွမ်းဆွတ်လျှက်..

စာဖတ်သူတို့အား အစဉ်လေးစားလျှက်..
မျှော်လင့်သူ..